پوليسو په کندهار کې څلور وسله وال نيولي
په نيول شویو کې يو غلچکی بريد کوونکی او درې نور د امنیتي ځواکونو پر وړاندې جګړه کوونکي وسله وال شامل دي.
د کندهار د پوليسو ویاند جمال ناصر بارکزي ازادي راډيو ته وويل چې دغه وسله وال د رواني اوونۍ له پیله په کندهار ښار کې د عملياتو پر مهال له يو شمېر وسلو سره نيول شوي.
د بارکزي په خبره، نیول شویو وسله والو منلې چې په ورانکارو فعاليتونو کې يې لاس درلود.
وسله والو طالبانو تر اوسه په دې اړه څه نه دي ويلي.