اشرف غني: د طالبانو پراخې حملې کمې شوي، خو د مرګژوبلو شمېر لوړ دی
د افغانستان ولسمشر محمد اشرف غني وايي، د طالبانو له لوري پراخې حملې کمې شوي، خو لا هم د دې ډلې په بریدونو کې د مرګژوبلو شمېر لوړ دی.
ولسمشر غني له ټېډ امریکايي بنسټ سره په انلاین مرکه کې وویل، په افغانستان کې لویې حملې کمې شوي، خو د وړو حملو د مرګژوبلو شمېر خورا زیات دی.
د ده په وینا هره ورځ له ۳۰ تر ۳۵ افغان امنیتي او دفاعي ځواکونه وژل کېږي او کابو ۷۰ نور ټپیان کېږي.
د دوشنبې په ورځ د افغانستان د ملي امنیت شورا په یوه خبرپاڼه کې اعلان وکړ چې تېره اوونۍ طالبانو ۸۴۱ افغان امنیتي ځواکونو ته مرګژوبله اړولې ده.
د ملي امنیت شورا ویاند جاوېد فیصل دا په تېرو ۱۹ کلونو کې افغان امنیتي ځواکونو ته تر ټولو خونړۍ اوونۍ وبلله.
ولسمشر غني په عین حال کې وویل چې طالبان د افغانستان د ټولنې یوه برخه ګڼي او هغوی هم باید ومني چې یوې سیاسي حللارې ته اړتیا ده.
ده دغهراز وویل چې له طالبانو سره د بندیانو د تبادلې لړۍ دوام لري او هیله لري چې ژر به د سولې خبرې پیل شي.