اشرف غني: که طالبان وینه توېدنه ودروي، ټول شرطونه یې منل کېږي

د افغانستان جمهور رئیس وایي، که طالبان د ده په ټکو وینه توېدنه ودروي، ټول شرطونه او غوښتنې به یې ومني. 

محمد اشرف غني دا څرګندونې کندهار ته د خپل سفر پر مهال وکړې او وېي ویل، طالبان باید له اوربنده ویره ونه لري: "دوی دې وینه بنده کړي چې موږ راشو او وغږېږو، ولې د وینو له بندولو ډارېږی؟ زما پوښتنه واضح ده، که سیاست کې ګډون غواړی موږ تیار یو، که افغانستان کې ژوند غواړئ په سر او سترګو، که پوهېږئ د ولس په زړونو کې ځای لرئ، راشئ چې انتخابات وکړو." 

ښاغلي غني وویل، د طالبانو شااوخوا شپږ زره زندانیان یې خلاص کړل، خو دغې ډلې تاوتریخوالی کم نه کړ او په خبره یې، داسې شرایطو کې ولس هم د طالبانو د نورو زندانیانو خوشې کولو ته رایه نه ورکوي. 

د بین الافغاني خبرو د وروستیو پرمختګونو پر مهال طالبانو تازه د ۷ زره نورو بندیانو د خوشې کېدو غوښتنه هم وکړه.