په اروپايي هېوادونو کې د "کوېډ١٩" ضد واکسین تطبیق پيل شوى
په اروپايي هېوادونو کې د کرونا ویروس پرضد د واکسیناسیون پراخ پروګرام روان دی.
د اروپايي ټولنې په ډېری هېوادونو کې دا واکسین لومړی هغو کسانو ته ورکول کېږي، چې کمزوري دي.
د دې ټولنې ۲۷ غړو هېوادونو د ډسمبر ۲۷ د V-Day په نوم یاده کړې ده.
د فایزر او بیو این ټیک کمپینو له خوا جوړ د کرونا ویروس پرضد واکسین چې هر چا ته دوه ځلې ورکول کېږي پرون د اروپايي ټولنې هېوادونو ته ورسېد.
د چک جمهوریت صدراعظم اندرې بابیش لومړی کس و، چې د پلازمېنې پراګ په پوځي روغتون کې واکسین شو. هغه خبریالانو ته وویل: "موږ به تر نهو میاشتو دې کمپاین ته دوام ورکړو خو دا د واکسین له کمیت او لاسرسي سره تړلې مسئله ده. د واکسین لپاره به آنلاین نوم لیکنه کېږي."
په ایټالیا کې چې د کرونا د وبا په پیل کې یې سختې ورځې ولیدلې، په جرمني او نورو اروپايي هېوادونو کې هم د دې واکسین کمپاین پیل شوی دی.
د اروپايي ټولنې په غړو کې له شپاړس میلیون زیات خلک په کويډ۱۹ ناروغۍ اخته شوي او ۳۳۶ زرو زیات کسان مړه شوي دي.