ولسي جرګې د کابل ښاروال "داود سلطانزوی" څارنوالۍ ته معرفي کړ
د جرګې منشي اسدالله شهباز ازادي راډیو ته وویل، په عمومي غونډه کې دغه پرېکړه نن وروسته له هغې وشوه چې ښاغلي سلطانزوی د وکیلانو استجواب ته حاضر نه شو.
هغه زیاته کړه: "ولسي جرګې ته د کابل د ښاروال د ناقانونه ګمارنو، د هوا ککړتیا او ښار کې د نورو ستونزو په اړه ډېر شکایتونه رارسېدلي وو، پرېکړه همدا وه چې ښاروال غونډې ته راشي او معلومات ورکړي، خو هغه حاضر نه شو."
شهباز وایي، له دې وړاندې څو ځله ښاغلی سلطانزوی د جرګي کمیسیونونو ته هم بلل شوی، خو ځواب ویلو ته نه دی ورغلی.
د ښاروالۍ ویانده سمیرا رسا بیا وایي، داود سلطانزوی تل ولسي جرګې ته ځواب ویونکی دی او په خبره یې، نوموړی د کابینې غونډه کې د بوختیا له کبله د جرګې استجواب ته نه دی تللی.