بشري حقونو افغان کمېسیون: افغان ځواکونو خوست کې دوه تنه وژلي
د افغانستان بشري حقونو خپلواک کمېسیون وايي چې د خوست ولایت په صبریو ولسوالۍ کې د افغان ځواکونو د هاوان مرمۍ له امله یوه ښځه او یو ماشوم وژل شوي دي.
د دغه کمېسیون ویاند ذبیح الله فرهنګ د شنبې (د وري ۲۱مه) په ورځ رسنیو ته په استولي پیغام کې ویلي چې دغه پېښه کې د یوې ښځې او ماشوم په ګډون شپږ تنه ټپیان شوي دي: "دواړه خواوې باید د افغانانو غوښتنې ومني او اوربند وکړي، له بلې خوا له افغان دولته مو غوښتنه دا ده چې د خلکو په ساتنه کې مخکښ شي او دې برخه کې مسولانه چلند وکړي."
خو دغه کمېسیون دا نه دي ویلي چې دا پېښه کله شوې ده؟
د خوست ولایتي قواوو که څه هم د ملکي مرګ ژوبلې په اړه څه نه وايي، خو څه موده وړاندې یې په یوه اعلامیه کې ویلي و چې په صبریو ولسوالۍ کې د تېرې مارچ میاشتې په۱۸ مه نېټه عملیات پيل او د همدې میاشتې تر ۲۹ یې دوام وکړ.
تېره اوونۍ د افغانستان د ملي امنیت ریاست ویلي و چې د خوست په صبریو، باک او ځاځي میدان ولسواليو په عملیاتو کې د حقاني شبکې ځینې غړي یې وژلي دي.