لوګر کې چاودنې ۳ افغان سرتیري وژلي او یو ولسي پاڅونوال یې ټپي کړ
د لوګر د امنیه قوماندانۍ ویاند ګل احمد حیدري ازادي راډیو ته وویل، پېښه نن شنبه (د غويي۴مه) له غرمې مخکې د مرکز پل علم په کنجک سیمه کې وشوه: "له غرمې مخکې شاوخوا ۱۱ بجې په کنجک سیمه کې د تروریستو طالبانو له خوا ایښودل شوی یو ماین د ملي اردو پر سرتېرو وچاودېد چې درې سرتېري یې شهیدان کړل او یو ولسي پاڅونوال یې ټپي کړ."
د دې چاودنې مسوولیت تراوسه کومې ډلې نه دی منلی.
د یوه بل خبر له مخې په پروان کې د پولیسو یو سرتېری په ډزو وژل شوی.
د پروان د امنیه قوماندانۍ د جنایي جرمونو پر ضد د مبارزې امر محمدصادق هاشمي ازادي راډیو ته وویل چې د مخدروموادو پر ضد د مبارزې دا پولیس نن شنبې په مرکز چارېکار کې د نامعلومو کسانو په ډزو وویشتل شو.
ددې پېښې پړه هم کومې وسله والې ډلې نه ده منلې.