کوټه کې وسله والو یو ځايي خبریال وژلی
د کوټې پولیسو (د اپریل ۲۵ مه) رسنیو ته په یوه اعلامیه کې ویلي، د ازادي نیوز ورځپاڼې خبریال عبدالواحد ریساني پرون ماښام د کوټې په قمبراني سړک وسله والو په ډزو ژوبل کړ چې وروسته یې په روغتون کې ساه ورکړه.
بل خوا د بلوچستان د خبریالانو اتحادیې د خبریال عبدالواحد ریساني د وژنې غندنه کړې او له حکومته یې د هغه د قاتلینو ژر تر ژره د نیولو او محاکمې غوښتنه کړې ده.
د بلوچستان د خبریالانو اتحادیې سکرتر جنرال فتح شاکر نن یکشنبه (د غويي ۵مه) رسنیو ته ویلي چې حکومت د ولس د ځان او مال په خوندي کولو کې ناکامه شوی دی.
نوموړي له حکومته خبریالانو ته د تحفظ ورکولو غوښتنه کړې ده.
تر اوسه معلومه نه ده چې د عبدالواحد ریساني په وژنه کې څوک لاس لري، خو د کوټې پولیسو ویلي چې د نامعلومو کسانو پر ضد یې راپور ثبت کړی او تحقیقات یې پیل کړي دي.
د پاکستان د بلوچستان ایالت مرکز کوټه ښار دا وروستۍ ورځې د مرګونو پېښو شاهد ده. د اپریل په ۲۱ مه د کوټې سرینا هوټل په پارکېنګ کې یوې چاودنې لږ تر لږه پنځه تنه وژلي او ۱۲ نور یې ټپيان کړي وو.
د دغې پېښې مسؤلیت تحریک طالبان پاکستان منلی و.