غور چارواکي: غبرګو پېښو کې ۱۵ وسله وال طالبان وژل شوي
په غور ولایت کې دوو پېښو کې د ۱۵ وسله والو د وژل کېدو خبر ورکړل شوی دی.
د غور د والي ویاند زلمي کریمي ازادي راډیو ته وویل، ۱۴وسله وال طالبان هغه وخت ووژل شول او ۱۱ نور ټپیان شول چې د تولک ولسوالۍ د مرکز د نیولو لپاره یې تېره شپه جګړه پیل کړه.
د والي ویاند وايي، د فیروزکوه په شمال کې پر یوه پوسته د طالبانو په بله حمله کې یو طالب وسله وال او درې سرتېري وژل شوي دي.
وسله والو طالبانو د افغان دولت دا ادعا رد کړې.
ددې ډلې ویاند قاري یوسف احمدي رسنیو ته په لیکلي پیغام کې لیکلي چې 'د دښمن ادعا دروغ' ده.
د غور د والي ویاند وايي، وسله والو پر تولک ولسوالۍ له درېیو شپو راهیسې خپلې حملې زیاتې کړي دي.