د افغانستان کرکټ یو لوبغاړی د درملنې په موخه پېښور ته لېږدول شوی
د افغانستان فرسټ کلاس کرکټ لوبغاړی زبیر احمدي چې د لیندۍ ۲۱مه د کابل جلال اباد په لویه لار په یوه ترافيکي پېښه کې سخت ژوبل شوی و د ښې درملنې په موخه پېښور ته لېږدول شوی دی.
د زبیراحمدي د کورنۍ غړي حمدالله طلوع ازادي راډيو ته په یوه پيغام کې ویلي: "زبېر احمدي د دوشنبې په ورځ د کابل څخه جلال آباد په لاره و چې د سروبي څخه ښکته تنګي کې یې د ماسپښین دوه بجو خواوشا ټکر وکړ. سینه یې شدیده ژوبله شوې، اوږه او ښي پښه کې یې فرېکچر راغلی."
د طلوع په وینا چې د احمدي صحي وضعیت د ډاډ وړ دی او د سينې ټپونو لږ ښه والي وروسته به یې د اوږې او پښې عملیات ترسره شي.
زبیراحمدي چې د کونړ ولایتي اوسېدونکی دی، د افغانستان د کورني کرکټ په تر ټولو سترو سيالیو فرسټ کلاس(څلور ورځنۍ) او لیسټ ای(یو ورځنۍ) کې لوبېدلی دی.
د یادونې ده چې د افغانستان ملي لوبډلې پیلیز لوبغاړی نجیب الله ترکی هم په ۲۰۲۰ زېږدیز کال په یوه ترافيکي پېښه کې ومړ.