د سپین بولدک - چمن سیمه کې طالبانو او پاکستاني ځواکونو ته مرګ ژوبله اوښتې
د سپین بولدک د طالبانو د مطبوعاتو مسوول علي محمد حقمل ازادي راډيو ته د یوه پیغام په استولو د جګړې د پېښېدو خبره وکړه، خو د تلفاتو یادونه یې نه ده کړې.
خو له سیمې ازادي راډيو ته په رسېدلو عکسونو او ويډیوګانو کې ښکاري چې د خلکو په کورونو د هاوان مرمۍ لګېدلي او د ماشومانو په شمول ځينې کسان ټپيان شوي.
د ډيورنډ کرښې هاخوا بیا د لږ تر لږه پنځلسو کسانو د ټپي کېدو خبره ځایي پوځي چارواکو رسنیو سره شریکه کړې او ویلي یې دي چې ټپیان د چمن روغتون ته وړل شوي.
د راپورونو له مخې طالبانو د شېرو اوبو په سیمه کې پوسته جوړوله چې د ډيورنډ کرښې له هاخوا پرې ډزې شوې دي.
د طالبانو ویاند ذبیح الله مجاهد په یوه ټویټ کې پر پېښه خواشیني وښوده او ویې ویل چې جګړه د پاکستاني عسکرو له لوري په ډزو سره پیل شوې.
هغه زیاته کړه: "اسلامي امارت د هرې ستونزې لپاره خبرې اترې یوه معقوله لار ګڼي، منفي اقدامات او د جګړې لپاره بهانې لټول د یوه لوري په ګټه هم نه دي."
تېره یکشنبه هم په دې سیمه کې درنه جګړه شوې وه چې دواړه غاړو ته لږ تر لږه ۷ کسان مړه او ۳۰ نور ژوبل شول.
هغې نښتې د پاکستاني چارواکو تُند غبرګونونه وپارول او طالب ځواکونه یې په پاروونکو اقداماتو تورن کړي وو.
د طالبانو د بهرنیو چارو وزارت هم په یوه بیان کې له پاکستاني چارواکو غوښتي وو چې د ورته پېښو د تکرار مخه ونیسي.