LVV e LDK pritet ta zyrtarizojnë marrëveshjen për koalicionin

Lëvizja Vetëvendosje dhe Lidhja Demokratike e Kosovës pritet që të dielën  ta nënshkruajnë marrëveshjen për koalicionin qeverisës.

Partia e Albin Kurtit dhe Isa Mustafës, siç merr vesh REL, do ta nënshkruajnë marrëveshjen pas dakordimit për dorëheqjen e Glauk Konjufcës nga posti i kryetarit të Kuvendit.

Pozita e kryetarit të Kuvendit ishte kusht i Lidhjes Demokratike të Kosovës për arritjen e marrëveshjes, kështu që me dorëheqjen e Konjufcës, ky post i lirohet LDK-së.

Marrëveshja e koalicionit qeverisës, para se të nënshkruhet duhet të marrë miratimin e organeve vendimarrëse të dy partive. Vetëvendosje dhe LDK, siç merr vesh REL, do të mbledhin organet e partive, këshillat e përgjithshëm që ta aprovojnë marrëveshjen. 

Sipas kësaj marrëveshjeje, LVV pritet të udhëheqë 6 ministri, aq sa dhe LDK-ja. Ndërkaq, 3 ministri do t’i takojnë komuniteteve.

Më 3 shkurt, në seancën plenare të thirrur nga i mandatuari për kryeministër, Albin Kurti, pritet të votohet për Qeverinë e ardhshme të Kosovës, të udhëhequr nga LVV-ja dhe LDK-ja.

Anëtarja e kryesisë së Vetëvendosjes, Arbërie Nagavci tha shkurt për Radion Evropa e Lirë se më 3 shkurt, Kosova “do ta ketë Qeverinë Kurti”.

Kryeministri në detyrë i Kosovës, Ramush Haradinaj ka thënë se lajmin se LVV dhe LDK kanë arritur marrëveshje "është veprim i duhur dhe konkretizim i mirë, që respekton rezultatin zgjedhor".

"Tashmë është e domosdoshme të formohet qeveria sa më shpejtë", ka shkruar Haradinaj në llogarinë e tij në Facebook.

Qeveria konsiderohet e zgjedhur nëse merr shumicën e votave (61 e më shumë) të të gjithë deputetëve të Kuvendit të Kosovës. Bazuar në numrin e deputetëve të Vetëvendosjes dhe Lidhjes Demokratike, shumica prej 61 votave është e pritshme të arrihet, pasi që në zgjedhjet e fundit parlamentare të mbajtura më 6 tetor, Vetëvendosje fitoi 29, kurse LDK 28 ulëse në kuvend. Këtij numri i shtohen edhe votat e komuniteteve pakicë, të cilat do të jenë pjesë e qeverisë po ashtu.

Megjithatë, në rast se përbërja e propozuar e qeverisë nga Albin Kurti nuk merr shumicën e votave të nevojshme, presidenti i Republikës së Kosovës, brenda 10 ditësh emëron kandidatin e ri për kryeministër.

Nëse as herën e dytë nuk zgjidhet qeveria, atëherë presidenti i Kosovës i shpall zgjedhjet, të cilat duhet të mbahen jo më vonë se 40 ditë nga dita e shpalljes së tyre.