Vitia: Jemi në koordinim zyrtar me komunat në veri
Ministri në detyrë i Shëndetësisë së Kosovës, Arben Vitia, tha se është në koordinim zyrtar me komunat në veri dhe se vendosja në karantinë e dy komunave është bërë në kuadër të masave që parashihen nga protokollet e epidemiologëve dhe organizatave ndërkombëtare të shëndetësisë, siç është Organizata Botërore e Shëndetësisë.
“Pandemia është kërcënim për gjithë njerëzimin, përballimi saj kërkon përkushtim dhe injorim të dallimeve të mundshme. Kujdes, ju lutem kujdes nga komunikatat e pasaktësuara”, ka thënë Vitia në një konferencë për media të mbajtur të shtunën në mbrëmje.
Çfarë po ndodhë në veri?
Komuna e Mitrovicës së Veriut dhe ajo Zveçanit janë vendosur në karantinë, pas paraqitjes së disa rasteve me koronavirusin e ri.
Kjo ka bërë që gjatë ditës së shtunë të ketë përplasje mes presidencës dhe qeverisë në detyrë të Kosovës.
Presidenti i Kosovës, Hashim Thaçi, ka thënë se situata e krijuar me pandeminë në komunat e veriut të Kosovës është e papranueshme.
Sipas tij kjo është rezultat i neglizhencës dhe papërgjegjshmërisë së Qeverisë së Republikës së Kosovës për t’i ndihmuar e mbrojtur qytetarët dhe integritetin territorial të Republikës së Kosovës.
“Qeveria e Republikës së Kosovës nuk guxon të lejojë që komunat në pjesën veriore të Kosovës të funksionojnë jashtë kontrollit menaxhues të institucioneve dhe organeve kompetente për parandalimin e pandemisë COVID-19, duke iu krijuar kështu hapësirë ilegale vepruese autoriteteve të Serbisë brenda territorit të shtetit tonë”, ka shkruar Thaçi në rrjetin social Facebook.
Pas kësaj deklarate, zyrtarët e Qeverisë së Kosovës në detyrë kanë theksuar se Ministria e Shëndetësisë është plotësisht e përfshirë në situatën emergjente të shëndetit publik në komunat veriore të vendit, në Mitrovicën e Veriut dhe në Zveçan.
Ushtruesi i Detyrës së ministrit të Punëve të Brendshme, Xhelal Sveçla ka thënë se Mitrovica e Veriut dhe Zveçanit janë futur në karantinë për shkak të 16 rasteve të konfirmuara me koronavirus.
Megjithatë, zyrtarët e Qeverisë së Kosovës nuk kanë dhënë ndonjë sqarim, apo koment, lidhur me situatën në të cilën Shtabi i krizës për luftë kundër koronavirusit në Mitrovicën e veriut dhe ai në Zveçan, kanë ndërmarrë masa që bien ndesh me ato që tashmë janë në fuqi nga Qeveria e Kosovës.
Lidhur me këtë situatë ka reaguar edhe Lidhja Demokratike e Kosovës. Përmes një komunikate për media, LDK-ja thotë se “situata në veriun e vendit, përveç problemeve me pandeminë po përkeqësohet edhe me ndërhyrjet e vazhdueshme të Beogradit.
Zëvendësi i kryetarit të Komunës së Mitrovicës së Veriut, Aleksandar Spiriq, i cili njëkohësisht është edhe kryetari i Shtabit të krizave të Mitrovicës së Veriut dhe kryetar i të ashtuquajturit Organ i Përkohshëm i Komunës së Mitrovicës, i cili vepron brenda sistemit serb, nuk ka dashur të përgjigjet në pyetjen e Radios Evropa e Lirë se a është Prishtina zyrtare e njoftuar për masat që janë marrë në Mitrovicën e veriut.
“Në këtë stuatë nuk ka vend për politikë”, ka deklaruar Spiriq.