Aplikimi i Kosovës, në rend dite në Këshillin e Evropës
Aplikimi i Kosovës për anëtarësim në Këshillin e Evropës pritet të jetë në rend dite të takimit të Këshillit ministror të kësaj organizate në Strasburg më 24 prill.
Në këtë mënyrë, pritet të nisë procedura e shqyrtimit të kërkesës gati një vit pasi Kosova aplikoi për anëtarësim në Këshillin e Evropës.
Burimet nga Asambleja Parlamentare e Këshillit të Evropës i thanë Radios Evropa e Lirë se presin që Këshilli i Ministrave vetëm të bartë kërkesën e Kosovës në këtë asamble. Më pas, ky institucion do të përgatisë raportin dhe mendimin e saj.
Ky hap nga Këshilli i Ministrave pritet të ndodhë në takimin e 24 prillit dhe më pas Asambleja Parlamentare do të diskutojë dhe votojë për raportin ose në takimin e radhës në qershor, apo atë që do të mbahet në tetor.
“Është e qartë në bazë të diskutimeve joformale që kanë pasur grupet parlamentare, se ekziston shumica prej dy të tretave [të votave] për pranimin e Kosovës. Prandaj, presim që kur të vije në rend dite, Asambleja do të konstatojë se Kosova i ka përmbushur të gjitha kushtet dhe do të rekomandojë pranimin e saj në Këshillin e Evropës. Pas kësaj do të vendos Këshilli i Ministrave”, tha një burim.
Burimet diplomatike i thanë REL-it se presin që edhe në vazhdim të procedurave për shqyrtimin e aplikimit të Kosovës të ketë taktizime dhe që hapat të lidhen me përmbushje e obligimeve që dalin nga Marrëveshja drejt normalizimit të raporteve që kanë arritur Kosova dhe Serbia.
“Realisht, nëse gjithçka shkon sipas planit, procesi i pranimit të Kosovës në Këshillin e Evropës do të mund të përmbyllej deri në fund të këtij viti”, tha një burim diplomatik për REL-in.
Pjesë e taktizimeve, sipas burimeve, është edhe tentimi që aplikimi i Kosovës të mos futet në rend dite gjatë samitit të Këshillit të Evropës që mbahet në mesin e majit në Islandë, e cila kryeson Këshillin e Ministrave.
Këshilli i Evropës, organizata më e vjetër evropiane që merret me zhvillimin e demokracisë dhe të drejtat e njeriut, ka procedura të caktuara për pranimin e anëtarëve të rinj. Këto procedura kalojnë përmes Këshillit të Ministrave dhe Asamblesë Parlamentare, ku marrin pjesë deputetët nga parlamentet e shteteve anëtare.
Kosova ka aplikuar për anëtarësim në Këshillin e Evropës më 12 maj 2022.
Kërkesa e Kosovës për anëtarësim në këtë institucion është një prej temave edhe në takimin e ministrave të Jashtëm të Bashkimit Evropian dhe sekretares së Përgjithshme të Këshillit të Evropës, Therese Blanche, që po zhvillohet në Luksemburg.
Këtë e ka konfirmuar ministri i Jashtëm i Kroacisë, Goran Gërliq-Ramdan, të hënën para nisjes së takimit të ministrave të Jashtëm.
“Ne do të kemi një takim me sekretaren e Përgjithshme të Këshillit të Evropës. Do ta shfrytëzoj rastin që të mbështesim fuqishëm kërkesën e Kosovës për pranim në Këshillin e Evropës”, tha kryediplomati kroat.
Siç kanë thënë burimet evropiane për Radion Evropa e Lirë, avancimi i kërkesës për anëtarësim të Kosovës në Këshillin e Evropës është po ashtu një prej të arriturave të dialogut mes Kosovës dhe Serbisë, që ndërmjetësohet nga BE-ja.
Megjithatë, burimet nuk kanë dashur të përgjigjen prerë nëse Serbia ka shkelur marrëveshjen drejt normalizimit të raporteve, që u arrit më 27 shkurt, ku thuhet se “Serbia nuk do ta kundërshtojë anëtarësimin e Kosovës në asnjë organizatë ndërkombëtare”.
Presidenti i Serbisë, Aleksandar Vuçiq, deklaroi në Beograd më 24 prill se shteti i tij do të votojë kundër anëtarësimit të Kosovës në Këshillin e Evropës.
Më herët, ministri i Punëve të Jashtme të Serbisë, Ivica Daçiq, është shprehur se do të punojë që të pengojë anëtarësimin e Kosovës në Këshillin e Evropës.
Për dallim nga Bashkimi Evropian, ku aplikimet për anëtarësim miratohen me konsensus, në Këshillin e Evropës pranimi i një anëtari të ri bëhet me shumicë votash.