Раиси пешини КДАМ-и Қазоқистон барои 18 сол зиндонӣ шуд
Додгоҳе дар Остона собиқ раиси КДАМ-и Қазоқистонро бо гуноҳи “хиёнат ба давлат” ва “талоши ғасби қудрат” дар ҳодисаҳои моҳи майи соли 2022 ба 18 соли зиндон маҳкум кард. Дар ин бора матбуоти Қазоқистон хабар дод.
Додгоҳ инчунин амр дод, ки ҳама моликияти Карим Масимов мусодира шавад ва тамоми умр аз ҳақи дарёфти мақоми давлатӣ маҳрум шавад. Се муовини Масимов ба мӯҳлатҳои каме поинтари зиндон маҳкум шуданд. Парванда пушти дарҳои баста баррасӣ шудааст.
Масимовро дар авҷи эътирозҳои мардумӣ ва беназмиҳои мусаллаҳона дар чанд вилояти Қазоқистон ҳабс карданд. Ӯ баландтарин мақомдори ҳукумат буд, ки аз рӯи он ҳодисаҳо ба ҷавобгарӣ кашида шуд.
Масимовро наздиктарин шахси собиқ президент Нурсултон Назарбоев меномиданд.
Бисёр ҷузъиёти ҳодисаҳои январи соли 2022, ки дар натиҷаи он беш аз 200 нафар кушта шуд, ҳанӯз номуайян боқӣ мемонад. Яке аз фарзияҳое, ки дар ҷомеаи Қазоқистон фаъолона баррасӣ мешавад, ин аст, ки эҳтимолан Назарбоев ва Масимов манфиатдори ташкили ин ҳодисаҳо буданд. Бисёр наздикони Назарбоев баъдан ба ҷавобгарӣ кашида шуданд. Вале расман мақомот масъулияти ин ҳодисаҳоро ба дӯши "нирӯҳои беруна" вогузор карданд.