Prezident soňky bir hepdede ikinji gezek kadr çalşygyny geçirdi
Türkmenistanyň prezidenti Serdar Berdimuhamedow soňky bir hepdäniň dowamynda ikinji gezek hökümetiň düzüminde kadr çalşygyny geçirdi.
Döwlet baştutany ýolbaşçylary wezipä bellemek we wezipeden boşatmak baradaky kararlaryny Ministrler Kabinetiniň 10-njy fewralda geçirilen giňişleýin mejlisinde yglan etdi.
Muhammetgeldi Nurgeldiýewiç Serdarowy, başga işe geçmegi sebäpli, Türkmenistanyň maliýe we ykdysadyýet ministri wezipesinden boşadyldy. Bu wezipä Serdar Açyldurdyýewiç Joraýew bellenildi. Ol öň Türkmenistanyň maliýe we ykdysadyýet ministriniň orunbasary wezipesini ýerine ýetirýärdi.
Şahym Abdrahmanowy, başga işe geçmegi sebäpli, Türkmenistanyň Ministrler Kabinetiniň başlygynyň orunbasary wezipesinden boşadyldy. Bu wezipä Aşyrguly Begliýew bellenildi. Ol öň Türkmenistanyň prezidentiniň nebitgaz meseleleri boýunça geňeşçisi wezipesini ýerine ýetirýärdi.
Çarymyrat Hywaliýewiç Purçekowy, başga işe geçmegi sebäpli, Türkmenistanyň Ministrler Kabinetiniň başlygynyň orunbasary wezipesinden boşadyldy. Bu wezipä Baýmyrat Ilmyradowiç Annamämmedow bellenildi. Ol öň Türkmenistanyň senagat we gurluşyk önümçiligi ministri wezipesinde işleýärdi.
Adatça bolşy ýaly habarda wezipelerinden boşadylan resmileriň haýsy işe geçýändigi aýdylmady.
Prezident Aba Annaýew adyndaky Halkara atçylyk akademiýasyny döretmek hakyndaky permana hem gol goýup, Pygy Hojamuhammedowiç Baýramdurdyýewi oňa rektor edip belledi.
Döwlet baştutany 3-nji fewralda hem kadr çalşygyny geçiripdi. Şonda ýurduň milli howpsuzlyk ministri, Ýokary kazyýetiň başlygy we onuň iki orunbasary wezipelerinden boşadylypdy.