Новости за 05.10.2023

Казанның Идел буе районында Газовая урамындагы 7 нче йорт янында Айрат Хәйруллин исемендәге парк барлыкка киләчәк. Бу хакта шәһәрнең торак-коммуналь хуҗалык комитетында сөйләделәр.

Зәй районы башлыгы Разиф Кәримов махсус хәрби операция зонасыннан ялга кайткан хәрбиләр белән очрашты. Хәрбиләр һәм район җитәкчелегенең очрашуы «Энергетик» Мәдәният сараенда чәй өстәле артында җылы мөгамәләдә узды. Бу хакта «Зәй яңалыклары» хәбәр итә.

Яшел Үзәннең Түбән Урысбага җирлеге башлыгы, Бәчек авылы имамы Хәйдәр Сибгатуллин социаль челтәрләргә табигатьтә һәм сыерлар арасында чыбыркы тотып төшкән фотолар куйган. Бу хакта «Яшел Үзән» хәбәр итә.

Лениногорск трамплинчылары Россия чемпионатында республика данын яклап чыгыш ясады. Ярышлар Сочи шәһәренең «Русские горки» трамплиннар комплексында өч көн буена дәвам итте. Бәйге 27,29 һәм 30 сентябрь көннәрендә, өч категориядә - хатын-кызлар, ирләр һәм ирләр командалары арасында узды. Бу хакта «Заман сулышы» хәбәр итә.

Түбән Кама районының Сухрау авылында яшәүчеләр махсус хәрби операциядәгеләргә гуманитар ярдәм җибәрде. Әйтүләренчә, хәрбиләр арасында авылдашлары да бар. Бу хакта «Туган як» хәбәр итә.

Әлмәт кешесе алиментлар буенча 1 миллион сумнан артык бурыч җыйган. Прокуратура таләпләре буенча ир-атка карата «балигъ булмаган балага суд карарын бозып, җитди сәбәпләрсез ата-ана тарафыннан акча түләмәү» маддәсе буенча җинаять эше кузгатылган. Бу хакта «Әлмәт таңнары» хәбәр итә.

Башкорт телен өйрәтүче яңа әсбап авторларының берсе, укытучы Ләлә Сафина балаларга өстәмә тел өйрәтүдән куркырга кирәкми, алган белемнәрнең кайчан да буласа кирәге чыгарга мөмкин дип саный.