Новости за 28.02.2024

12 февральдә Тверьдә стоматология клиникасында наркоздан соң 3 яшьлек кыз бала вафат була. Тверь өлкәсе буенча Тикшерү комитеты моның буенча җинаять эше ачты. Бу хакта НТВ телеканалы хәбәр итә.

Краснодар краенда салкын өйдә 5 баласын 4 көнгә калдырып киткән хатынга карата прокуратура эш ачкан. Бу турыда «Комсомольская правда» яза.

Факил Сафин татар язучыларын һәм Бөтендөнья татар конгрессы вәкилләрен бер залга җыеп, татар язучысы нинди булырга тиешлеген, гомумән милли җанлы татар шәхесенең идеаль моделен күрсәтте.

Халык «Башкорт хуҗабикәсе» буларак белгән блогер Миләүшә Шәйхисламова үзенең интим проблемалары хакында сөйләгән. Ул социаль челтәрдәге язылучыларына үзенең тагын бер тапкыр әни булырга теләве турында хәбәр иткән, ләкин балага уза алмавын әйткән. Бу турыда «Яшьлек» газетасы яза.

Африка кызы Нгамбога өйләнгән Пермь өлкәсе Седяш авылыннан татар егете Марат Дәүләев социаль челтәрдә шактый югалып торганнан соң яхшы хәбәр белән чыкты. Яшь гаиләнең кызы туган.

Татарча җырлаучы рус кызы Анастасия Макаровага «Татарстанның атказанган артисты» дигән мактаулы исем бирелгән.

Америка Кушма Штатларында Техас штатында берьюлы берничә округта табигать янгыннары чыккан. Бу хакта төбәкнең урман хуҗалыгы хезмәте хәбәр итә. Иң көчле янгын Хатчинсонда теркәлгән, дип яза Фонтанка сайты.

29 февральдә Татарстанда алмашынучан-болытлы, явым-төшемнәрсез һава торышы була. Көньяк-көнбатыштан уртача тизлектә, көндез урыны белән 14 метр тизлектә көчле җил. Төнлә һәм иртән һава температурасы -7..-12˚, аязганда -13..-18˚, көндез +1..-4˚ градус. Юлларда бозлавык.

Россия Кораллы Көчләрен дискредитацияләгән һәм Россиядән чит илгә киткән шоу-бизнес вәкилләре, кире кайткан очракта, үз гамәлләре өчен закон буенча җавап бирәчәк. Бу хакта ТАССка биргән интервьюсында Россия Тикшерү комитеты рәисе Александр Бастрыкин әйтте.

Азнакай районы Урманай мәктәбенең бер укучысы өчен туган көне онытылмаслык булган. Дәрес вакытында кереп, аңа махсус операциядәге әтисе җибәргән бик матур чәчәк букеты тапшыралар, якын кешесенең аудиокотлавын тыңлаталар. Бала күз яшьләрен тыеп тора алмый.

Җырчы, алып баручы Рамил Хәйретдиновның әнисе бик каты авырып киткән. Артист якын кешесенең могҗиза белән генә исән калуы хакында яза, «подписчик»ларыннан әнисе өчен дога кылуларын үтенә.

Зөлфирә һәм Алмаз Мирзаяновлар Казанда 4 көн өр-яңа концерт программаларын тәкъдим итәләр. Шул уңайдан концертта мәгариф һәм фән министры Илсур Гәрәй улы Һадиуллиннан рәхмәт хаты тапшырылды.

Илнат Фәрхуллин актив иҗат итүен дәвам итә, аның чираттагы яңа җыры чыкты. Җырчының иҗатын күзәтеп баручылар «Миңа син кирәк» җырының премьерасы белән котлаганнар.

25 февральдә Башкортстанның Яңавыл шәһәрендә шәхси йортта 69 яшьлек хатын-кыз һәм 26 яшьлек ир-ат мәете табыла. Аларда көнкүреш газы исе белән агуланып үлү билгеләре була. Гадәттән тыш хәлләр министрлыгы белешмәсе буенча, алар әниле-уллы булып чыккан. Бу турыда «Башинформ» яза.

«ТНВ-Татарстан» телеканалының социаль челтәрдәге сәхифәсендә Әбри Хәбриев «Ә син?» тапшыруына курсташы Рәфинә Ганиуллинаны чакырган.

«Интертат» хәбәрчесе Фирдүс Тямаевның Чаллыда узган концерт-тамашасын карап кайтты.