Киев жана медиа уюмдар Орусияда украин журналистинин соттолушун айыпташты
Украин президенти Петро Порошенко журналист ойдон чыгарылган айыптардын негизинде соттолгонуна көңүл буруп, “орус сотунун болуп көрбөгөн цинизми Кремл украиналыктардын духун сындыруу аракетин токтотпой турганын далилдеди” деп белгиледи.
Ал эми ЕККУнун медиа эркиндиги боюнча өкүлү Арлем Дезир сот өкүмүн айыптап, Москваны орус журналистин бошотууга чакырды.
Роман Сущенкону бошотууну Орусиядан Журналисттерди коргоо комитети да талап кылып, орус бийликтери өз ырастоолорун “далил” менен камсыздай албаганын баса көргөздү.
“Укринформ” агенттигинин Париждеги кабарчысы болуп иштеген Сущенко 2016-жылы Москвага келгенде “жашыруун маалымат жыйнап жүрөт” деген шек менен камакка алынган.
Орусиянын Федералдык коопсуздук кызматы - ФСБ ал Украинанын Коргоо министрлиги үчүн иштейт жана орус армиясы, Улуттук гвардиясы тууралуу маалымат топтогон деп ырастаган.
Сущенко быйыл март айында, сот башталганда эле күнөөсүн моюнга алган эмес. Прокурорлор аны 14 жылга кесүүнү суранышкан.
Журналисттин адвокаты Марк Фейгиндин айтымында, Сущенко каршы айыптар саясий жүйөдөн улам ойдон чыгарылган жана сот өкүмү апелляцияга берилет. (UE)