Казакстан: Кытайда кармалган этникалык казактарды бошотуу талабы айтылды
Агасы Жеңишбек Султанбектин маалыматына караганда, иниси камалган кезде Казакстандагы туугандарына “Элбашыдан алкыш кагаз алганым үчүн күнөөлүүмүнбү?” деген мазмунда кат жөнөткөн. Ал Ертай Султанбектин диний экстремизмге катышы жоктугун, Кытайда анын өмүрүнө жана ден соолугуна коркунуч жаралып жатканын кошумчалады.
Жарандык активист Серикжан Билеш Ертай Султанбек акын, композитор экенин, 2007-жылы казак президенти Нурсултан Назарбаевге “Нураганын монологу” деген поэма арнаганын маалымдады. 2008-жылы президент авторго ыраазычылык кат жиберген.
Маалымат жыйын өткөргөндөр Назарбаевдин Кытайдагы сапарында этникалык казактардын көйгөйүнө бийликтин көңүлүн бурдуруу максатын көздөп жатканын айтышты.
Казакстан Тышкы иштер министрлиги билдиргендей, 177 этникалык казак Кытайдан чыга албай туткунда калган. Астана “саясий жактан кайра тарбиялоо” жайына түшкөн казактарды бошотуу боюнча Бээжинге бир нече жолу кайрылган.
Кытайда бир катар этникалык кыргыздар да кысымга кабылып, бир тобу камалып кеткенин былтыр алардын жакындары "Азаттык" радиосуна маалымдашкан. "Азаттыктын" кабарчысы билдиргендей, президент Сооронбай Жээнбековдун Кытайга мамлекеттик сапарында бул маселенин көтөрүлгөнү кабарланган жок. (NT)