Сауд Арабия медицина тармагына 3,8 млн. долларга жакын грант бөлөт
Сауд Арабия Кыргызстанга медициналык жабдууларга жана эт экспорттоого 3 млн. 797 миӊ доллар өлчөмдө грант бөлөт.
Бул тууралуу Жогорку Кеңештин 4-октябрдагы жыйынында саламаттык сактоо министри Космосбек Чолпонбаев билдирди. Анын маалымдашынча, Сауд өнүктүрүү фонду берген каражат бир катар долбоорлорго берилет.
Алар: Кара-Кулжа жана Түп айылында үй-бүлөлүк медициналык борборлорду, Улуттук фтизиатрия борборунун кургак учук бөлүмүн жабдыктар менен жабдылоого, Сауд Арабия Падышалыгына этти экспорттоо үчүн Чүй обласуна карантиндик зона курууга, Жүрөк хирургиясы жана органдарды трансплантациялоо илимий-изилдөө институтун заманбап медициналык жабдуулар менен жабдууга берилет.
Эки тараптуу гранттык келишимди ратификациялоо боюнча мыйзам долбоорунун концепциясы добуш берүүгө жөнөтүлдү. (КЕ)