Жорж Соростун үйүнүн сыртынан жарылуучу түзмөк жок кылынды
Бул тууралуу АКШнын бийлик өкүлдөрү кабарлашты. Маалыматка караганда, жарылуучу түзмөк америкалык миллиардер Жорж Соростун Нью-Йорк штатындагы үйүнүн сыртындагы почта үкөгүнөн 22-октябрда табылган.
Аны эң биринчи болуп Соростун кызматкерлеринин бири көрүп, полицияны чакырган. Кийин адистер тобу жарылуучу түзмөк үйдүн жанындагы токойлуу аянтта зыянсыздандырышты.
Полиция түзмөктө “чыныгы бомбанын компоненттери”, анын ичинде жарылуучу порошок болгонун кабарлады.
“Нью-Йорк Таймс” гезитинин жазганына караганда, Сорос өзү бул окуя учурунда үйүндө болгон эмес. Аны азыр Федералдык иликтөө бюросу - ФБР иликтөөдө.
Венгрияда туулган, учурда жаш курагы 88ге карап калган миллиардер дүйнөдө демократияны жана адам укуктарын колдош үчүн миллиарддаган доллар сарптаган. Ал - АКШнын Демократиялык партиясынын да ири донорлорунун бири.
Сорос акыркы жылдары АКШнын өзүндө жана башка өлкөлөрдө оңчул активисттер жек көргөн фигурага айланып, Венгриянын улутчул өкмөтү медиада ага каршы өнөктүк да жүргүзгөн.