Пирматов: Терек-Сайда сурма машинелеп мыйзамсыз ташылууда
Жогорку Кеңештин депутаты Исхак Пирматов Чаткалдын Терек-Сай аймагынан сурма бир топ жылдан бери машинелеп мыйзамсыз ташылып кетип жатканын билдирди. Эл өкүлү аймакта тартипти күчөтүп, пост койгондон маселе чечилбей турганын белгиледи:
- Бул жолго салынган ири бизнес. Анда көптөгөн адамдар бар. Бир-эки "Портер" эмес, сурма "Ховолоп" ташылып кетип жаткан. Казынага бир тыйын түшпөй, аткезчилик жол менен ташылып кетип жаткан көрүнүш калыптанып калган. Пост койгон менен маселе чечилбейт. Ош шаарында сурмага суроо-талапты жаратып жаткан күчтөрдү жок кылганда гана маселе чечилет.
Пирматов Чаткалда кен иштетүүгө берилген 158 лицензиянын үч--төртөө гана чулу кен болсо, калганы чачыранды экенин, андан казынага тыйындай эле каражат тушүп жатканын кошумчалады:
- Сууну булгап жаткан дагы, жолду бузуп жаткан да, токойду кыйып жаткан да ошол чачыранды кен. Элдин нааразылыгын да чыгарып жатат. Бюджетке бир жылда төккөн каражат 50-60 миң сомду түзөт. Айыл өкмөт, аким, депуттар, саналуу адамдар анын үзүрүн көрүп жатышат. Эки айылдын эли булганган сууну ичип, запкысын тартып жатат.
Депутат эл арасындагы чыңалууну жоюш үчүн чачыранды кендерди жабууну сунуш кылды.
Жогорку Кеңеш учурда Терек-Сайдагы кырдаалды талкуулап жатат. (КЕ)