АКШнын аскер учагы Украинанын үстүнөн "кезексиз" учуу жасады
Америкалык учактын Украинанын үстүнөн учуусу 6-декабрда болгон. Бул тууралуу Пентагон билдирди.
Расмий маалыматка караганда, АКШ Украинанын үстүнөн “адаттан тыш” учууну аскерий байкоо боюнча эл аралык келишимдин чегинде жасады.
Америкалык тарап ошондой эле бул кадамын “АКШнын Украина жана башка өнөктөш өлкөлөр алдындагы милдеттемесин ырастоо” деп да түшүндүрдү.
Пентагон ошондой эле алардын учагынын Украина үстүнөн учуусу Орусия Кара деңизде украин кемелерине “кол салып”, анын “чагымчыл жана коркуткан ишмердүүгү күчөп турган” учурда болгонуна да көңүл бурду.
2002-жылдан бери “Ачык асман” деп аталган келишим ага кол койгон 34 өлкөгө бири экинчисинин аба мейкиндигине куралсыз учактар менен байкоо салуучу учууларды аткаруусуна жол берет.
Бул учуулар тууралуу күн мурунтан кабарланат. Бирок эки мамлекет бири экинчисине уруксат берсе адаттан тыш жана мурда мерчемделбеген учууларды аткарууга да мүмкүндүк бар.
АКШ учагы Украина үстүнөн учканы жарыяланганга чейин CNN телеканалы Вашингтон Кара деңизге аскерий кеме жиберүүнү караштырып жатканын да маалымдаган. Бирок бул маалымат расмий ырастала элек.
25-ноябрда Кара жана Азов деңиздери кесилишкен Керч кысыгында болгон окуяны Украина жана Батыш өлкөлөрү “агрессия”, Орусия “чагым” деп баалаган.
Орусия анда Украинанын үч кемесин, 24 деңиз аскерин күч менен кармап кетип, кийин аскерлердин баарын эки айга камакка алган. (UE)