د کندز په چهاردرې کې د افغان ځواکونو تصفیوي عملیات پای ته ورسېدل
په کندز کې د ملي اردو د کومانډو ځواکونو د لسم کنډک قوماندان محمد علي احمدي وايي چې په دغه درې ورځنیو عملیاتو کې ۲۱ تنه وسله والو مخالفين وژل شوي او سربېره پر دې، ۹ کلي هم د دغې ډلې له شتونه پاک شوي دي.
دی وایي:
"د دې عملیاتو په جریان کې موږ ۹ کلي د دښمن له وجوده پاک کړل او همداراز ۲۱ تنه وسله وال مخالفين وژل شوي او په وژل شویو کې د طالبانو مهم کسان هم شامل دي او موږ د دښمن ۲۹ حلقې ماینونه شنډ او یوشمېر مهم سنګرونه مو ورته وران کړل."
بل خوا د سیمې ځايي اوسېدونکي بیا وايي چې د دغو تصفیوي عملیاتو له کبله، لسګونه کورنۍ له خپلو مېنو څخه بې ځايه شوي او ملکي خلکو ته په کې ځاني او مالي تاوانونه هم اوښتې دي.
خو د کومانډو ځواکونو د لسم کنډک قوماندان د خلکو د ادعاو په ردولو سره وايي چې په دغه عملیاتو کې پرته له وسله والو مخالفينو هېڅ چاته زیان نه دی رسېدلی.
خو تراوسه پورې وسله والو مخالفينو په دې اړه څه نه دي ویي.