نقيب الله فايق د فاریاب د نوي والي په توګه معرفي شو
د محلي ارګانونو خپلواکې ادارې رئيس عبدالمتين بېګ پرون په فارياب کې د ښاغلي فايق د معرفۍ په غونډه کې وويل، افغان حکومت به د امن په ټينګښت او پرمختيايي چارو کې د نوي والي د هڅو ملاتړ وکړي.
فارياب ته نوى والي په داسې حال کې معرفي کېږي چې د سې شنبې په ورځ د فارياب د قيصار ولسوالۍ د سرپرست امنيه قوماندان نظام الدين قيصاري نيول کېدل، په ميمنه کې د مظاهرو او ناکرارۍ سبب شول.
نظام الدين قيصاري د ولسي پاڅونوالو په چارو کې د ولسمشر د لومړي مرستيال عبدالرشيد دوستم استازى هم و چې لويې څارنوالۍ ته معرفي شوى دى.
جمهوري رياست وايي، قيصاري د خلکو تر شکايتونو وروسته ونيول شو.