دوستم له ١٤ مياشتنۍ جلاوطنۍ وروسته نن هېواد ته راستون شو
په کابل کې ګڼ کسان چې په هغوى کې ځيني عالي رتبه دولتي چارواکي هم شامل وو، د ښاغلي دوستم هرکلي ته ورغلي وو.
ښاغلي دوستم په دې مناسبت جوړې شوې غونډې ته په وينا کې وويل:
"صحي ستونزې مې درلودې چې ترکيې ته مې سفر وکړ، هلته مې د ترکي ډاکټرانو له خوا لس پنځلس ورځې تداوي روانه وه، له روغتونه رخصت شوم، خو راته وويل شول چې بيا بيا بايد د صحي معاينې لپاره ورشم، ځکه هلته د څه مودې لپاره پاتې شوم."
عبدالرشيد دوستم وروسته له هغې چې د جوزجان له پخواني والي احمد ايشچي سره په ناوړه چلند تورن شو، ترکيې ته لاړ.
ښاغلي دوستم د احمد ايشچي تورونه رد کړي او ويلي يې وو، د کورنيو دلايلو او خپلې تداوۍ لپاره ترکيې ته تللى دى.