په بلخ کې د سوداګرو ښځو د کورنیو تولیداتو نندارتون جوړ شو
د بلخ د سوداګرۍ او صنایعو خونې مسؤلان وايي چې د سوداګرو ښځو د تولیداتو دا نندارتون د ښځو په ځانګړي تجارتي مرکز (رابعه بلخي مارکېټ) کې جوړ شوی دی چې اساسي هدف یې د سوداګرو ښځو د ځان بساینې په منظور د داخلي تولیداتو او د سوداګرو ښځو د لاسي صنایعو پېژندنه او هغو ته بازار موندنه ده.
د دې خونې اجرائیه مدیر نصیر احمد قاسمي یې په اړه وايي:
"یوه برنامه مو همدا ده چې څرنګه وکولای شو چې د سوداګرو ښځو تولیداتو او لاسي صنایعو ته بازار موندنه وکړو، د دې ډول نندارتونونو جوړول خپله د تولیداتو له خرڅلاو سره مرسته کوي او ورته یو ډول بازار موندنه ده."
د ښاغلي قاسمي په خبره چې دا نندارتون د درېیو ورځو لپاره دی چې په ۴۰ غرفو کې د بلخ د سوداګرو ښځو تجارتي محصولات او لاسي صنایع پکې نندارې ته ايښودل شوي دي.
په دې نندارتون کې د ښځو غذايي محصولات، په لاس جوړ شوي توکي او نور کورني تولیدات نندارې ته وړاندې شوي.