د پروان په شینوارو ولسوالۍ کې یوې چاودنې دوه ملکي وګړي ووژل
![د پروان په شینوارو ولسوالۍ کې یوې چاودنې دوه ملکي وګړي ووژل](https://gdb.rferl.org/435E1C75-E69D-46BC-B6C2-5F17A621EACE_w800_h450.png)
د پروان ولایت په شینوارو ولسوالۍ کې دوه ملکي وګړي په یوه چاودنه کې ووژل شول او یو بل ټپي شو.
د پروان امنیه قوماندان محمد محفوظ ولیزاده ازادي راډيو ته وویل، پېښه هغه مهال وشوه چې د ملکي وګړو موټر پر یوه ماین برابر شو.
ښاغلي ولیزاده زیاته کړه چې په دې پېښه کې یوه ځوانه نجلۍ او یو نارینه ووژل شول او یو ماشوم ټپي شو.
ښاغلی ولیزاده وايي چې دا موټر له اشتر ښار کلي څخه د شینوارو ولسوالۍ د مرکز پر لور روان و چې ماین پرې وچاودېد.
د دې چاودنې مسؤلیت تراوسه کوم کس یا ډلې نه دی منلی.