امریکا د هغو وسلو نمونې خبریالانو ته وښودې چې ایران طالبانو ته ورکړي
متحده ایالاتو پرون د هغو وسلو نمونې خبریالانو ته وښودلې چې د چارواکو په وینا، ایران طالبانو ته ورکړې دي.
د ایران لپاره د امریکا د حکومت ځانګړي استازي براین هوک پرون پنجشنبه هغه وسلې او تجهیزات خبریالانو ته وښودل چې د ده په وینا، ایران یې په افغانستان کې طالبانو او د سیمې په نورو هېوادو کې ورانکارو ډلو ته ورکوي.
ده وویل:
"فجر توغندي! دا وسله افغان ملي اردو په هلمند کې له طالبانو څخه نیولې ده، کیڼې خوا ته مې د شهید ۱-۲-۳ په نوم بې پیلوټه نوی هوايي سېسټم وینئ چې له نسکورېدو وروسته د نړیوال ائتلاف د ځواکونو لاس ته ولوېد."
ښاغلي هوک پر دې سربېره د صیاد، توفان او توسن په ګډون د څو نورو توغنديو او وسلو یادونه هم وکړه چې د ایران حکومت یې په یمن، بحرین او د منځني ختیځ په نورو هېوادونو کې حوثي، حماس او نورو یاغي ډلو ته ورکوي.
د ښاغلي هوک له څرګندونو یوه ورځ مخکې د امریکا سنا په یوه غونډه کې په یمن کې د سعودي په مشرۍ ائتلاف څخه د امریکا پر ملاتړ انتقاد وکړ، خو د بهرنیو چارو او دفاع وزیرانو چې په دې غونډه کې حاضر و، له سناتورانو سره مخالفت وکړ.