د تکواندو افغان لوبغاړو ٧ مډالونه ګټلي
د افغانستان د تکواندو افغان لوبغاړو ٧ مډالونه ګټلي دي.
د افغانستان د تکواندو ملي فدراسیون د نشراتو مسوول ذبیح الله شهزاد نن سې شنبه (د سلواغې ۱۴مه) ازادي راډیو ته وویل چې د افغانستان د تکواندو د پومسه لوبډلې په نړیوالو لوبو کې تر ګډون وروسته افغانستان ته دغه ویاړ وربښلې.
نوموړي وویل چې دغه سیالۍ د نیپال په کوربه توب د ٣٠ هېوادونو د لوبډلو ترمنځ په انلاین ډول ترسره شوې.
ښاغلی شېرزاد وایي: "په یادو سیالیو کې مجید قاري زاده د سرو زرو مډال، سید رستم اکبري د سپینو زرو او سید ظریف هاشمي د بُرونزو مډال، سمیه عادل نیازۍ د بُرونزو مډال، انزورت ولي د بُرونزو مډال، عبدالموعود احمد د بُرونزو او سردار اغا هم د بُرونز مډال خپل کړ."
دغه سیالۍ تېره اوونۍ په انلاین ډول ترسره شوې وې چې پایلې يې نن سې شنبه معلومې شوې.
دا لومړی ځل دی چې د تکواندو پومسه لوبغاړي په نړیوالو سیالیو کې په انلاین ډول برخه اخلي او ویاړ خپلوي.