د مصالحې عالي شورا د 'ترویکا پلس' غونډې د اعلامیې هرکلی کړی
د افغانستان د ملي مصالحې عالي شورا د افغانستان د سولې په اړه د ترویکا پلس غونډې د اعلامیې هرکلی کړی.
په دې غونډه کې چې پرون (د غویي په ۱۰مه)ماښام د قطر په پلازمېنه دوحه کې جوړه شوه د امریکا، روسیې، چین او پاکستان استازو برخه درلوده.
د ملي مصالحې د عالي شورا ویاند فریدون خوځون نن شنبې (د غویي په ۱۱مه) په یوه غږیز پیغام کې وویل چې دا شورا د ترویکا پلس په اعلامیه کې په افغانستان کې د تاوتریخوالي د کمولو، اوربند، د سولې د بهیر د ګړندي کولو او له افغانستانه د نړیوالو ځواکونو د مسوولانه وتلو د یادونې هرکلی کوي.
ښاغلي خوځون هیله وښوده چې افغانان به د ترویکا د هڅو په مرسته سولې ته ورسېږي: "موږ د ترویکا د غړو هېوادونو د وروستۍ اعلامیې هرکلی کوو او هیله من یو چې د دوی په مرسته رغوونکي او هدفمند مذاکرات ولرو او د مذاکراتو په لړ کې موږ یوه سیاسي توافق ته ورسېږو چې ټول اړخونه د مذاکراتو ګټونکي وي."
د ترویکا پلس په اعلامیه کې افغان حکومت او طالبان دواړه د سولې په خبرو کې پرمختګ ته هڅول شوي دي.