مالدارانو سره مرسته؛ کرنې وزارت هالنډ کمېټې او ملګرو ملتونو سره هوکړه وکړه
کرونا ویروس چې تر دې دمه یې خلکو ته ګڼ مالي زیانونه او ځاني تلفات اړولي د افغانستان د کرنې او مالدارۍ سکټور هم ترې خوندي نه دی پاتې.
۴۰ کلن بزګر او مالدار هلال دا مهال د بادغیس په چکاک سیمه کې ژوند کوي وايي، د کرونا ویروس له امله ورته ډېر زیانونه اوښتي دي.
هلال زیاته کړه: "نورو کلونو کې به، دا مالونه هرات او کندهار ته تلل او بهر ته صادرېدل، خو اوس پولې تړل شوي، موږ ونه شو کولی چې د کرونا ویروس له امله بهر ته خپل مالونه صادر کړو، نو ځکه د دې بیه خورا ټیټه شوه. د دې ترڅنګ چې وړۍ خرڅې نه شوې، شیدې او غوړي یې هم چا وا نه خېستلې."
په همدې حال کې د افغانستان د کرنې او مالدارۍ وزارت بیا له مالدارانو سره د مرستې په موخه د هالنډ له کمېټې او د ملګرو ملتونو د خوړو له نړیوالې ادارې سره هوکړه لاسلیک کړه.
دغه تفاهم لیک د یکشنبې (د غويي ۱۹مه) په ورځ د کرنې وزیر انوارالحق احدي او د افغانستان لپاره د هالنډ کمېټې اجرائیوي رئیس ریموند بریسکو ترمنځ لاسلیک شو.
ښاغلي احدي په یاده ناسته کې وویل چې د دغه هوکړه لیک پر بنسټ ۱۵۴ میلیونه افغانیو په ارزښت د کرونا له امله زیانمنو شویو مالدارانو او کوچیانو سره مرستې کېږي.
ښاغلي احدي وویل، د دې پروژې پیسې د کرنې پراختیا نړیوال صندوق له خوا ورکول کېږي: "د دې پروژې ډېره ګټه کوچیانو ته رسېږي. دا ورته د پام وړ ارزښت لري چې نږدې زر مټریک ټنه د څارویو خواړه ویشل کېږي. د څارویو لپاره ۱۵ کلنیکونه هم جوړیږي او عامه پوهاوی ورکول کېږي."
ښاغلی احدي وایي، وزارت د مالدارانو د وضعیت ښه والي لپاره د پراخو پروګرامونو په لټه کې دی.
په ورته وخت کې په افغانستان کې د هالنډ کمېټې اجرائیوي مشر، ریموند بریسکو وویل چې د زیان منونکو مالدارانو سره د مرستې پروګرام د دې کمېټې او د کرنې وزارت د "کلب" پروژې په همکارۍ ترسره کېږي.
ښاغلي بریسکو وویل، د کرونا ویروس خپرېدو په ټولو صنایعو او کارونو اغېز کړی، خو په لېرې پرتو سیمو کې مالدارانو او بې وزلو کورنیو ته یې ډېر زیان اړولی دی.
نوموړي وویل: "دغه پروژه د افغانستان خلکو سره مرسته کوي، څو اړین پروګرامونه تر لاس لاندې ونیسي، همدارنګه له کرونا ځپلو سره مرسته کوي، په تېره هغه مالداران چې د کرونا پرمهال له زیانونو سره مخ شول، د پروژې اصلي هدف کوچیانو سره مرسته ده."
په ورته وخت کې د کوچیانو د همغږۍ کمېټې مشر حبیبالرحمان په یاده ناسته کې وویل، تمه لري له دې لارې کوچیانو سره اړینه مرسته وشي او له ښو خدمتونو برخمن شي.
د افغانستان ډېری وګړي په کرنه او مالدارۍ بوخت دي او خپل ورځني لګښتونه له همدې لارې تامینوي.