له افغانستانه د امریکایي ځواکونو وتل؛ د کانګرس یوه کمېټه پرې غږیږي
د استازیو جرګې د وېب پاڼې له مخې د څارنې او اصلاحاتو د کمېټې په دې غونډه کې به چې د افغانستان لپاره د امریکا ځانګړی استازی زلمی خلیلزاد هم وربلل شوی، پر دې خبرې وشي چې د روان کال د سېپټمبر تر ۱۱مې پورې له دې هېواده د ټولو امریکایي ځواکونو وتل به د امریکا ملي امنیت او د سیمې ثبات ته څه پایلې ولري.
د خبرپاڼې له مخې د ځواکونو د ایستلو او په افغانستان کې د جګړې د پای ته رسولو لپاره د ولسمشر بایډن پرېکړه یوه تاریخي پرېکړه ده، خو د دغو ځواکونه وتل د امریکا ملي امنیت، په اوږده مهال کې د افغان دولت ثبات او د سیمې ثبات ته خطرونه ولري.
په دغه استماعیه غونده کې به له افغانستان سره د بیارغونې د دوام او دا چې د امریکا د مالي مرستو د بې ځایه لګېدو د مخنیوي څه ډول څارنه کېدای شي، په اړه هم خبرې وشي.