د کابل-غور لویه لار بېرته د ټرافیکو پر مخ پرانیستل شوه
د کابل-غور لویه لار د دوو ورځو تر تړل کېدو وروسته بېرته د ټرافیکو پر مخ پرانیستل شوه.
د لعل و سرجنګل ولسوالۍ د ځینو اوسېدونکو د اعتراض له کبله دغه لاره تړل شوې وه.
دوی چې د ناامنیو پر زیاتېدو اعتراض درلود، له مرکز فېروزکوه تر لعل و سرجنګل ولسوالۍ یې د لارې په اوږدو کې د امنیتي پوستو غوښتنه کوله.
د غور والي عبدالظاهر فیضزاده تېر ماښام ازادي راډیو ته وویل: "دوی ژمنه کړې چې له امنیتي ځواکونو سره خپلې همکارۍ ته دوام ورکړي، دغه لویه لار چې د دوو پوځي اډو د ایجاد لپاره د ولسي اعتراضونو له کبله تړلې وه پرانیستل شوه، د امنیتي ځواکونو او خلکو ترمنځ د لارې د پرانیستل کېدو لپاره د هر اړخیزې همکارۍ موافقه شوې ده."
په وروستیو کې د غور-کابل او غور-هرات پر لویه لار د ناامنیو ځینې پېښې شوې دي.