چین او پاکستان له افغانستان سره د بشري مرستو؛ سولې او ټیکاو په اړه خبرې کړي
د پاکستان صدراعظم عمران خان چې د ژمنیو المپیکي لوبو لپاره چین ته تللی پرون یې له ولسمشر شي جین پينګ سره کتلي دي.
د پاکستان د بهرنیو چارو وزارت تر دې ناستې وروسته په یوه ګډه اعلامیه کې ویلي چې دواړو مشرانو د افغانستان سوله او ثبات د سیمې د سوکالۍ او پرمختګ اساس بللی دی.
په ګډه اعلامیه کې راغلي چې عمران خان او شي جن پینګ له افغانانو سره د بشري مرستو په اهمیت خبرې وکړې او هم یې په نړیوالې ټولنې غږ وکړ چې افغانانو سره دې دوامداره مرستې وکړي او هم دې کنګل شوې شتمنۍ ورخلاصې کړي.
د خان او شي تر لېدنې مخکې د پاکستان د بهرنیو چارو وزیر شاه محمود قریشي له خپل چینايي سیال وانګ یي سره کتلي.
قریشي په یوه کنفرانس کې وویل چې تمه ده چین د مارچ په اخره کې د افغانستان د نږدې ګاونډیانو د بهرنیو چارو وزیرانو ناسته جوړه کړي.
قریشي وویل:" موږ د افغانستان د نږدې ګاونډیانو یوه ناسته جوړوو. چین،پاکستان،ایران،تاجکستان او ازبکستان دا به ټول راغوښتل کېږي. په پای کې به یې د افغانستان د بهرنیو چارو سرپرست وزیر هم راغواړو چې له هغه سره خبرې وکړو."
قریشي وویل چې د افغانستان،پاکستان او چین درې اړخیزه ناسته به هم له سره پيلیږي او د افغانستان په اړه د سلا مشورو او همغږیو پر سر مفصلې خبرې وشوې.
له کله چې تېر اګست میاشت طالبان واک ته رسېدلي د پاکستان لوړپوړو چارواکو څو واره افغانستان ته سفرونه کړي او په بېلابۍلو هېوادونو کې یې د افغانستان اړوندو مسئلو باندې څرګندونې کړي دي.
د طالبانو حکومت تر دې دمه د پاکستان او چین د چارواکو تر منځ د ناستې په اړه څه تبصره نه ده کړې خو له دې مخکې د پاکستاني چارواکو ځینې اقدامات او څرګندونې د افغانستان په چارو کې ښکاره لاسوهنه یاده شوې.
له هغې ډلې د اسلامي همکاریو د سازمان د بهرنیو چارو وزیرانو په اولسمه فوق العاده ناسته کې چې د ډسمبر په ۱۹ په اسلام اباد کې وشوه د افغان نجونو د زده کړو په تړاو د عمران خان څرګندونو چې په دې برخه کې شته محدودیت یې د افغانستان کلتوري مسئله وبلله تُند غبرګونونه وپارول.
پخواني ولسمشر حامدکرزي هماغه وخت خان ته توصیه کړې وه چې د افغانستان په کورنیو چارو کې له لاسوهنې او د افغانستان په استازولۍ له خبرو کولو ډډه وکړي.