د ملګرو ملتونو امنیت شورا د اوکراین پر وضعیت فوق العاده غونډه وربللې
د ملګرو ملتونو امنیت شورا د اوکراین پر وضعیت فوق العاده غونډه وربللې ده.
بل لورته د اوکراین پولې ته نژدې د روسي پوځیانو د تحرکاتو د ډېروالي په خاطر اوکراین کې بیړنی حالت نافذ شوی دی.
لویدیځو قدرتونو د روسیې د تحرکاتو له کبله پر مسکو بندیزونه لګولي، خو د روسیې ولسمشر وایي جدي ځواب به ورکړي.
ولادیمیرپوتین نن په اوکراین کې د پوځي عملیاتو اعلان هم وکړ او ويې ویل، له دې عملیاتو یې هدف د ملکي کسانو خوندیتوب دی.
پوتین په یوه ټلوېزیوني وینا کې وویل، دوی د اوکراین له خوا د ورپېښ ګواښ په غبرګون کې دا اقدامات کوي، خو په خبره یې روسیه دا هدف نه لري چې اوکراین اشغال کړي.
پوتین خبرداری ورکړ چې که نور هېوادونه د روسیې په اقداماتو کې د مداخلې هڅه وکړي، له بې ساري عواقبو سره به مخامخ شي.
ده د اوکراین له سرتیرو وغوښتل چې وسلې پر ځمکه کېږدي.
بل لورته د اروپایي ټولنې مشران نن د بلجیم په پلازمېنه بروکسل کې جرګه کېږي او له روسیې سره د راتلونکو معاملو پر څرنګوالي بحث کوي.
د اروپایي شورا مشر چارلز میچل " Charles Michel" ویلي، په ۲۱مه پيړۍ کې د ځواک کارونه او د پولو بدلون ځای نه لري.