Hoti prezanton masat e pakos së rimëkëmbjes ekonomike
Në një komunikatë për media nga Zyra e Kryeministrisë është thënë se në pakon në fjalë përfshihen këto masa:
“Lehtësimi i qasjes në financim, zvogëlimi i barrës tatimore, masat për mbështetje të punësimit, bujqësia, masat për stimulim të kërkesës agregate, mbështetja për ndërmarrje publike për operim të rregullt dhe investime kapitale të rëndësisë strategjike, rishikimi i buxhetit për 2020 dhe relaksimi i kufizimeve fiskale dhe i borxhit publik, masa mbështetëse për ekonomi nga sektori financiar, dhe mobilizimi për financimin e masave”.
Kryeministri Hoti është cituar të ketë thënë se në bazë të një vlerësimi të përgjithshëm, është kuptuar se ekonomia e Kosovës ka pësuar rreth 5 për qind të bruto produktit të brendshëm, si rezultat i pandemisë me koronavirus.
Megjithatë, ai është zotuar për t’iu ofruar përkrahje bizneseve në kalimin e vështirësive, pas përhapjes së sëmundjes Covid-19, që shkakton koronavirusi.
Ai ka përmendur vjeshtën si periudhë kur pret që të kompensohen bizneset për humbjet e tyre gjatë pandemisë.
“Gjatë fazës së implementimit do të punojmë bashkë për t’u siguruar se këto fonde do të shkojnë në vendin e duhur, atje ku japin efektin maksimal. Mbi të gjitha këto masa nuk interferojnë shumë në parimet bazike të konkurrencës, gjithmonë duke i respektuar udhëzimet e Komisionit Evropian dhe të organizatave të tjera ndërkombëtare sa i përket ndërhyrjeve në ekonomi që po i bëjnë qeveritë e ndryshme”, është cituar të ketë thënë Hoti.
Ai nuk ka përjashtuar mundësinë e funksionalizimit të Këshillit Kombëtar për Zhvillim Ekonomik për të tejkaluar këtë periudhë, si dhe krijimin e një baze ligjore, përmes së cilës mund të identifikohen kursimet e krijuara nga projektet që nuk kanë arritur të realizohen si pasojë e pandemisë dhe me të njëjtat të krijohet një pjesë e konsiderueshme e mjeteve.
Kosova ka regjistruar rastet e para me koronavirus më 13 mars.
Autoritetet deri më tani kanë regjistruar 1,269 raste të prekura me këtë virus.
Prej tyre, 31 pacientë kanë vdekur.