Javën tjetër vendoset për finalen e Ligës së Kampionëve

Federata Evropiane e Futbollit (UEFA), ka thënë se do të vendosë javën tjetër si do të përfundojë Ligën e Kampionëve dhe Ligën e Evropës, pasi ndeshjet janë pezulluar në muajin mars, si pasojë e përhapjes së koronavirusit të ri.


UEFA ka thënë përmes një deklarate më 11 qeshor se, Komiteti i saj ekzekutiv do të takohet më 17-18 qershor për të përcaktuar agjendën e së ardhmes.


Finalja e Ligës së Kampionëve ishte përcaktuar që të organizohej në Stamboll, ndonëse UEFA ka thënë se është duke shqyrtuar “një varg mundësish” për të përfunduar turneun.


Kryetari i Madridit ka thënë më herët gjatë kësaj jave se zyrtarët e qytetit të tij kanë zhvilluar takime rreth mundësisë së organizimit të finales së Ligës së Kampionëve në qytetin që udhëheqin, nëse UEFA nuk zhvillon ndeshjen në Stamboll.


Në takimin e komitetit ekzekutiv, UEFA ka thënë se do të diskutohet edhe Gara Evropiane e Futbollit, Euro 2020, organizim që është shtyrë për vitin 2021.


Gara e 24 ekipeve do të zhvillohet në 12 qytete, në gjithë kontinentin evropian.