Vizita e Ramës, mbështetje dhe ndërhyrje ndaj Kosovës
Njohësit e zhvillimeve politike në Kosovë, vizitën e kryeministrit të Shqipërisë Edi Rama në Prishtinë, e kanë vlerësuar të rëndësishme, por deklarimet Ramës për unitet në spektrin politik në Kosovë, i shohin si ndërhyrje të panevojshme.
Rama ka qëndruar në Kosovë për dy ditë ku ka takuar udhëheqës të institucioneve të Kosovës dhe të partive politike.
Ai në përfundim të vizitës tha se veprimi nga Zyra e Prokurorit Special të Gjykatës Speciale ndaj presidentin, Hashim Thaçi dhe kryetarit të Partisë Demokratike të Kosovës, Kadri Veseli, është i padrejtë dhe paraqet sprovë të natyrës kombëtare. Ai ka thëne se për historinë dhe gjeneratat tjera, duhet te ketë unitet me njeri tjetrin.
“Dua ta bëj të qartë faktin se jam këtu, në funksion të një nevoje kombëtare, për t’i dhënë mbështetje të plotë Kosovës dhe të gjithë përfaqësuesve politikë në kushtet kur ka ndodhur diçka e rëndë dhe thellësisht e padrejtë”, tha Rama.
Rama foli në një konferencë për media në Aeroportin e Prishtinës, pak para se të largohej nga Kosova.
Vizitën e kryeministrit të Shqipërisë Edi Rama Ramës duhet parë me tepër në funksion të përfitimit politik nga ana e tij, sesa si kontribut për skenën politike të Kosovës, tha për Radion Evropa e Lirë, njohësi i çështjeve politike, Imer Mushkolaj.
Ai shtoi se për të arritur një unitet politik në Kosovë, nuk janë të nevojshme ndërhyrjet nga jashtë.
"Unitetin duhet ta arrijnë vet politikanët në Kosovë, pa pasur nevojë të ndërhyjë dikush nga jashtë, në këtë rast as Edi Rama", tha Mushkolaj.
Sipas tij, klasa politike në Kosovë është aq e pjekur sa të di si të sillet me përgjegjësi në situata të ndjeshme.
Ndërkaq, politologu, Ramush Tahiri, tha për Radion Evropa e Lirë se vizita e kryeministrit të Shqipërisë në këtë kohë ishte e mirëseardhur, pavarësisht se ajo mund të konsiderohet edhe si vizitë politike.
"Kosova ka nevojë për ndërhyrje të miqve në këtë rast nga Shtetet e Bashkuar të Amerikës, po pse jo edhe të Shqipërisë. Kosova nuk ka nevojë për ndonjë paternalizëm dhe vet Rama e tha se ai dëshiron të këshilloj dhe jo t'i mësoj. Është e vërtetë se Kosova ka nevojë për unitet politik, sidomos në këtë kohë", tha Tahiri.
Gjatë vizitës në Kosovë, kryeministri Rama tha se Shqipëria e ka detyrim të mbështesë Kosovën.
"Shqipëria e ka detyrim të mbështes Kosovën pa kushte dhe cilido që është në rolin e kryetarit të qeverisë në Shqipëri duhet të jetë mishërim i këtij detyrimi. Por Shqipëria nuk e ka dhe as nuk do ta marr për sipër detyrën e kujdestarit apo të mentorit që nga lart i tregon udhëheqësish në Kosovë se çka duhet të bej", tha Rama.
Kryeministri i Shqipërisë, Edi Rama, me liderët e partive politike, ka biseduar me theks të vecat për rreth aktakuzës për krime lufte që ka paraqitur Zyra e Prokurorit Special kundër presidentit të Kosovës, Hashim Thaçi, kryetarit të Partisë Demokratike të Kosovës, Kadri Veseli, dhe të tjerëve.
Thaçi, i cili ka ndërprerë udhëtimin drejt Shteteve të Bashkuara, ku pritej të mbante një takim me homologun serb, Aleksandar Vuçiq, mbrem i është drejtuar opinionit në lidhje me aktakuzën.
Ai ka thënë se nëse konfirmohet aktakuza e Prokurorit të Specializuar kundër tij, atëherë do të japë menjëherë dorëheqje nga pozita që ka.
Ai shtoi se Kosova është shtet i ri, por udhëheqësit e saj duhet të sillen si burrështetas të vërtetë.
Javën e kaluar, Zyra e Prokurorit të Specializuar ka njoftuar se më 24 prill u ka dërguar Dhomave të Specializuara të Kosovës, me seli në Hagë, një aktakuzë me dhjetë pika për shqyrtim, në të cilën Thaçi, Veseli dhe të tjerë akuzohen për krime kundër njerëzimit dhe krime lufte.
Ende nuk është e qartë se kush bën pjesë në grupin e "të tjerëve", siç i ka cilësuar Zyra e Prokurorit.Çështja kalon tani te gjykatësi i procedurës paraprake, i cili do të vërtetojë ose hedhë poshtë aktakuzën.