Кохи Сафед гуфт, ки музокирот бо Толибон “идома мекунад”

Кохи Сафед мегӯяд, ки музокироти Доналд Трамп, раиси ҷумҳури Иёлоти Муттаҳида, бо мақомоти баландпояи ин кишвар дар бораи гуфтугӯҳои сулҳи Афғонистон “бисёр хуб анҷом шуд”. Ба иттилои манбаъ, гуфтугӯҳо бо Толибон “идома меёбад”. Мақомоти Амрико рӯзи 16-уми август аз мулоқоти Трамп бо мушовиронаш хабар доданд.

Ҳадафи ин мулоқот гуфтугӯҳо бо Толибон дар бораи хуруҷи эҳтимолии нерӯҳои амрикоӣ аз Афғонистон ва ҷустуҷӯи як роҳи ҳалли сиёсӣ барои ҷанги тақрибан 18-сола хонда шудааст.

Доналд Трамп баъд аз мулоқоти рӯзи ҷумъа дар Твиттер навишт, як мулоқоти бисёр хуб дар мавриди Афғонистонро тамом кард. Кохи Сафед дар як хабарнома гуфтааст, Трамп дар ин маврид бо Майк Пенс – муовини раиси ҷумҳур, Майк Помпео – вазири умури хориҷӣ, Марк Эспер – вазири дифоъ, Ҷон Болтон – мушовири амнияти миллӣ, Ҷина Ҳаспел – раиси идораи истихбороти марказӣ ва Залмай Халилзод – намояндаи вижаи Иёлоти Муттаҳида барои сулҳи Афғонистон мулоқот кардааст.

Дар хабарнома гуфта шудааст: "Мо бо идомаи ҳамкории наздик бо ҳукумати Афғонистон, дар пайи даст ёфтан ба як мувофиқатномаи сулҳ, бо шумули коҳиши хушунатҳо ва барқарории оташбас ҳастем, то бовар ҳосил кунем, ки аз хоки Афғонистон дигар ҳаргиз барои таҳдид кардани Амрико ё муттаҳидонаш истифода нахоҳад шуд.”

Залмай Халилзод барои поён бахшидан ба ҷанги тақрибан 18-солаи Афғонистон бо Толибон дар Қатар ҳашти даври гуфтугӯҳоро анҷом додааст. Вашингтон гуфтааст, мехоҳад як муомилаи сулҳ то аввали моҳи сентябри имсол ниҳоӣ шавад.