Сӯхтор дар бозори Шаҳритус ба садҳо тоҷир зиён расондааст. ВИДЕО
Мақомот дар ноҳияи Шаҳритуси вилояти Хатлон гуфтанд, ки сабаби асосии сӯхтор дар бозори марказии ноҳияро таҳқиқ доранд. Ҳодиса 24-уми май рух дод ва ба маълумоти ибтидоӣ ба 800 тоҷир зиён расондааст.
Саймуддин Лоиқов, як масъули ҳукумати Шаҳритус, 25-уми май ба Радиои Озодӣ гуфт, "ба эҳтимоли зиёд расиши ноқилҳо сабаби сӯхтор шудааст. Бо ин ҳол, мунтазири натиҷаҳои тафтишот мемонем."
Шоҳидон мегӯянд, ду мошини оташнишонии ноҳияи Шаҳритус натавонистанд, алангаи оташро хомӯш кунанд ва барои кумак мошинҳо аз ноҳияи Носири Хусрав ва Қубодиён даъват шудааст.
Саймуддин Лоиқов гуфт, бештари дӯконҳо аз масолеҳи пластикӣ сохта шуда буд ва онҳо натавонистанд оташро зуд хомӯш кунанд. "Вале чанд хона ва бонку дорухонаҳои атрофи бозоро тавонистем аз чанги сӯхтор наҷот диҳем", - афзуд ӯ.
Мақомот ба соҳибкорони зарардида ваъда додаанд, ки барои барқарор кардани корашон сабукӣ медиҳанд. Ҷаббори Ғаффор, раиси ноҳияи Шаҳритус, рӯзи 25-уми май ба Радиои Озодӣ гуфт, андозро камтар мекунанд ва масъалаи пардохти қарзҳои бонкии тоҷиронро баррасӣ менамоянд.
Раиси ноҳия афзуд, идораи Тоҷикматлубот ваъда додааст, дар муддати кӯтоҳ бозорро аз нав месозад.
Соҳибкорон мегӯянд, дар шароити ногувор мондааанд ва намедонанд, чӣ кор кунанд. Қурбоналӣ Қурбонов, тоҷири бозори марказии Шаҳритус, мегӯяд, ба ҷуз аз бору дӯконҳои бародаронаш, ки ба коми оташ рафтанд, худаш низ 100 ҳазор сомонӣ зарар дидааст. "Ба ҷаласа даъват карданд, вале рафта натавонистам. Ҳуҷҷатҳоро аз ҷойи ҳодиса мекобам, вале пайдо накардам. Ҳуҷҷате, ки ба мардум қарз дода будем. Ман зарари зиёд дидам, боз 5 дӯкони бародаронам сӯхт, намедонам, ки чӣ мешавад," - афзуд ӯ.
Ноҳияи Шаҳритус ду бозори калон дорад. Яке бозори марказист, дувумӣ - "Ином". Чанд сол пеш моликони бозори "Ином" бар сари тақсими бозор бо Муҳибулло Саъдуллоев, додарарӯси раиси ҷумҳурии Тоҷикистон баҳс доштанд. Аммо масъулини ноҳияи Шаҳритус гуфтанд, рӯзи 24-уми май на бозори "Ином", балки бозори марказии ноҳия сӯхтааст.