Қирғизистон барқро барои камбизоатҳо арзон кард
Президенти Қирғизистон Содир Ҷабборов фармон дар бораи кӯмак ба хонаводаҳои камбизоатро аз ҳисоби поин бурдани нархи нерӯи барқ содир кард.
Ба огаҳии хадамоти матбуотии президенти Қирғизистон, Девони вазирони ин кишвар вазифадор шудааст, то аз 1 январи соли 2022 нархи 1 киловат-соат барқро барои хонаводаҳое, ки кудаки то 16-сола доранд ва аз давлат кумакпулӣ дарёфт мекунанд, 50 тийин муайян кунад.
Ҷабборов моҳи ноябр дар ҷаласаи Шӯрои амнияти Қирғизистон гуфта буд, ки нархи 1 киловат-соат нерӯи барқ барои хонаводаҳои камбизоат аз 77 то ба 50 тийин арзон карда шавад.
Ин дастур дар пасманзари норасоии неруи барқ дар Қирғизистон содир шудааст. Қирғизистон соли равон ба иллати камобӣ дар обанборҳояш бо бузургтарин буҳрони энергетикӣ рӯбарӯ шуд.