«Бик авыр... Йөрәгем телгәләнә» – Гастрольгә киткән яшь әниләр сабыйларын сагына

Артистларның урак өсте – гастрольләр чоры башланып китте. Бу көннәрдә барлык җырчылар да диярлек үзләренең яңа концерт программалары белән шәһәр-районнарга юл тотты. Өйне ташлап, чит җирләрдә яшәү болай да кыен нәрсәдер инде ул. Сәхнә хакына быел беренче тапкыр сабыйларын калдырып гастрольгә чыгып киткән яшь әниләргә исә аеруча да читен – үз өеңнән еракта булу өстенә баланы сагыну хисе дә өстәлә.

Иртән Гөлназ Асаева сторисларына үзенең мөлдерәп яшь белән тулган күзләрен яшермичә бер фото урнаштырган иде.

«Мәсәгут, иртәгә очрашабыз! Шулай озакка гаиләмне калдырып чыгып китүе ничек авыр… Йөрәгем телгәләнә… Динә шундый нык елады. Мин нишләрмен, әйтә алмыйм», – дип язды ул анда.

Көн дәвамында шундый ук эчтәлектә диярлек тагын бер сториска тап булдык. Яшь әни Зөлфирә Мирзаянова да нәни кызчыгы белән аерылышуны бик авыр кичерә.

«Без 1 айлык гастрольләргә чыгып киттек. Мондый әйберләрне күрсәткәнем юк иде… Бик авыр… Баламны сагынам», – дигән җырчы, макияжлы йөзенә караганда инде сәхнәгә чыгар вакыты булса да, елап беткән фотосын куеп.