AMANAT партиясының бағдарламасы: жаңадан 1,2 млн оқушы орны ашылады
Бүгін "AMANAT" партиясының Республикалық сайлауалды штабының мүшелері Қызылорда облысында болды. Өңірде педагогтарымен, ғалымдарымен, шаруалармен және спортшылар қауымымен бірқатар кездесу өтті.
Аймақтағы педагогтармен өткен кездесуде партияның сайлауалды бағдарламасының білім беру саласындағы басымдықтары талқыланды.
"AMANAT" Төрағасы Ерлан Қошанов бұл салада азаматтардың орынды наразылығын тудыратын бірқатар шешілмеген мәселе бар екенін атап өтті.
"Үш ауысымды және апатты жағдайдағы мектептер, мектепке дейінгі білім беру мекемелердегі орын тапшылығы, мектеп оқушыларының шамадан тыс жүктемесі, ауыл мен қаладағы білім беру сапасындағы теңсіздік мәселелері бар. Еліміздің әрбір тұрғыны сапалы білімге қол жеткізе алуы тиіс. Сондықтан партия осы саладағы мәселелерді түбегейлі шешуді көздейді", - деді Ерлан Қошанов.
Жалпы, ел аумағында партия кемінде 1,2 миллион оқушы орнын және балабақшаларда 300 мың орын ашуды қамтамасыз етеді. Жөндеуді және заманауи жабдықтармен қамтамасыз етуді қоса алғанда, еліміздегі үш мың мектеп толық жаңғыртылады. Атап айтқанда, Қызылорда облысында 26 білім беру нысаны тұрғызылып, 4 мектепке жапсарлас қосымша ғимарат салынады. Бұған қоса, 17 білім беру мекемесінде күрделі жөндеу жұмысы жүргізіледі.
Өз кезегінде кездесуге қатысушылар кітапханашылардың, зертханашылардың және басқа да техникалық қызметкерлердің жалақысын көтеру мәселесін қозғады. Бұл проблеманы білім беру мекемелерінде жан басына шаққандағы қаржыландыру нормативін ұлғайту арқылы шешуге болады.
Бұдан соң партиялықтар "Жан-Арай" көпбейінді агроиндустриялық кешен алаңында Ы.Жақаев атындағы Қазақ күріш шаруашылығы ҒЗИ ұжымымен және облыстағы күріш өсірушілерімен кездесті. Дихандар үшін басты мәселе - егін суаруға арналған су тапшылығы. Бұл проблеманы шешу үшін партиялықтар "Күміскеткен" және "Қараөзек" су қоймаларының құрылысын, сондай-ақ Қызылорда су торабын қайта жаңартуды ерекше бақылауға алады.
Сонымен қатар, шаруалар субсидиялау жүйесіндегі олқылыққа қынжылысын жеткізді. Олардың айтуынша, биылғы жылы несиенің пайыздық мөлшерлемесі күрт өскен, ал мемлекеттік субсидиялар уақытылы төленбей, субсидия алуға өтінімдер берілетін gosagro.kz порталы іс жүзінде жұмыс істемейді. Штаб мүшелері заңнамалық деңгейде тұрақты және ашық субсидиялауды қамтамасыз етуге уәде берді.
Осы күні спортшылар қауымымен кездесу өтіп, оған 400-ден астам адам қатысты. Штаб мүшелері спортшыларға партияның кәсіби және бұқаралық спортты дамытудағы, сондай-ақ салауатты өмір салтын насихаттаудағы басымдықтары туралы айтып берді.
Дайындаған: "AMANAT" партиясының баспасөз қызметі Тапсырыс беруші: М.Ж. Оспанов