Армениянын өкмөт башчысы коронавирус жугузуп алды
Армениянын премьер-министри Никол Пашинян жана үй-бүлөсүнүн төрт мүчөсү коронавирус инфекциясын жугузуп алды. Бул тууралуу Пашинян 1-июнда «Фейсбуктагы» түз эфир маалында айтты. Ал өкмөттүн ишин алыстан жетектеп турарын билдирди.
Пашинян аскерлер менен жолугушуп келгенден кийин тест тапшырганын, анын жыйынтыгы 31-майда белгилүү болгонун, азыр өзүндө жана үй-бүлө мүчөлөрүндө илдеттин симптомдору жок экенин белгиледи.
Арменияда COVID-19га кабылгандар 9 400 кишиден ашты. 139 бейтап каза болду.
Өлкөдө 16-марта киргизилген өзгөчө абал 13-июнга чейин узартылган. 18-майда өлкөдө коомдук транспорт иштей баштаган. Бирок жүргүнчүлөр милдеттүү түрдө беткап тагынып, мээлей кийиши керек. Соода борборлору, коомдук тамактануу жайлары да ачылды.