Пленковиќ - Каква осуда на Шешељ за газењето на хрватското знаме, такви односи со Србија

Српскиот државен врв го осуди вчерашниот инцидент што го предизвика Воислав Шешељ во Собранието на Србија, газејќи го знамето на Хрватска и пцуејќи ја хрватската парламентарна делегација, но, според хрватскиот државен врв, „осудата била двосмислена“, а српскиот претседател Александар Вучиќ „го релативизирал настанот“.

Српскиот претседател Александар Вучиќ за постапката на Шешељ рече дека дека таквото однесување е „нешто недопустливо“, но и дека „Србите и во тоа се разликуваат од Хрватите“, нагласувајќи дека пред и по неговата посета на Хрватска „во Загреб биле запалени неколку српски знамиња, а хрватски пратеник го бркал по улиците и го нарекувал четник“.

На оваа изјава реагираше хрватскиот премиер Андреј Пленковиќ, кој побара Србија строго и недвосмислено да го осуди инцидентот со Шешељ и дека продолжувањето на односите со Србија ќе биде „во контекст на таа осуда“.