Заев - Две недели прекраток рок за решение за името
![Заев - Две недели прекраток рок за решение за името](https://gdb.rferl.org/35AFFB2D-ADF3-452F-A39D-8FAC0001ADC9_w800_h450.jpg)
Премиерот Зоран Заев не верува дека за две недели може да се реши спорот за името, коментирајќи ја изјавата на еврокомесарот за проширување Јоханес Хан оти Скопје и Атина можат да постигнат договор во наредните 15 дена.
„Јас тоа го посакувам, но верувам дека не е можно, затоа што утре имаме средба помеѓу двајцата министри за надворешни работи. Знам од прилика како ќе се разговара и до каде очекуваме да завршиме. Генерално тоа што јас го очекувам е да направиме максимални напори до одлуката на Советот на Европската унија, затоа што сигурни сме дека ако имаме решение дотогаш, покрај тоа што заслужуваме, ќе добиеме дефинитивни и најсилни гаранции оти ќе добиеме датум за преговори“, рече Заев.
Заев денеска имаше заедничка прес- конференција со поранешниот генерален секретар на НАТО, Џорџ Робертсон. Тој е е еден од членовите на новоформираната група Охрид за поддршка на Македонија на патот кон ЕУ и НАТО. Групата Охрид е неформална група создадена од членови со импресивен бекграунд, со различна политичка припадност.
Во групата, освен Џорџ Робертсон се вклучени и поранешниот висок претставник на ЕУ за надворешна политика и безбедност Хавиер Солана, поранешниот шведски премиер и министер за надворешни работи Карл Билд и истакнатите дипломати Кристофер Гајд, Роберт Гелбард, Ален Ле Роа, Волфганг Ишингер, Дајмонд Вилсон и Зоран Чичак.