„Титаник“: се пребројувале полнолетни деца без родители за изборите во 2013

Судењето за предметот на СЈО „Титаник“ продолжува денеска во Кривичниот суд со слушање на прислушуваните разговори од доказниот материјал на обвинителството.

На денешното рочиште за случајот за изборни нерегуларности, во прислушуваните разговори се слуша како се одвиваат подготовките за локалните избори во 2013 година, односно како во телефонски разговор на поранешниот министер за транспорт и врски Миле Јанакиески и директорка на дом за деца без родители пребројуваат колку од штитениците наполниле 18 години и стекнале право на глас.

На минатото рочиште беа пуштени прислушувани разговори во кои се слушаше како Јанакиески бара од неговите соговорници да најдат противкандидати на ВМРО-ДПМНЕ за локалните избори во 2013 година, како и тоа дека за таа услуга се бараат пари за поткупување на противкандидатите.

Беа пуштени и разговори во кои се слуша како поранешната министерка за внатрешни работи Гордана Јанкулоска за нерегуларности во избирачките списоци на соговорник му вели дека и покрај забелешките „нема да има проблеми“, бидејќи од ДИК претходно рекле дека се е ок. Во еден од разговорите Јанкулоска откри дека на една адреса се воделе по 50 луѓе.

Во предметот „Титаник“ обвинет е и поранешниот премиер Никола Груевски, како и други поранешни функционери на ВМРО-ДПМНЕ кои се осомничени за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување на изборен материјал и злоупотреба на средства за финансирање изборна кампања.