Дваесет грчки функционери осомничени во врска со пожарот кај Атина

Дваесет грчки функционери се осомничени за разни кривични дела во врска со пожарот во близина на Атина на 23 јули годинава во кој загинаа 99 луѓе. Обвинителскиот тим, кој го истражува пожарот, ги повика 20-те функционери наредната недела да дадат исказ во врска за делата за кои се сомничат. Роднини на жртвите уште летоска поднесоа кривични пријави против различни грчки функционери.

Обвинителите ги повикаа да дадат исказ префектот на покраината Атика, Рене Дуру, како и претседателите на општините Маратон и Рафина. Повикани се и поранешниот генерален секретар на Службата за цивилна заштита на Грција, поранешниот шеф на грчката полиција, како и сегашни полициски функционери и вработени во Службата за цивилна заштита, Противпожарната служба и Крајбрежната стража.